قصّتنا: قطعة مجوهرات… وسلسلة أرواح
إيدين حرفي على الطاولة ببرج حمّود.
من أربع سنين، بورشة طلي دهب، تعرّفت على صايغ. اللي بلّش كشغل صار بالنسبة إلي عيلة.
اليوم، كل قطعة مصنوعة يدوياً من MINIZ بتنولد على طاولات برج حمّود، لبنان، بين إيدين خمس عيل.
من الرسمة للمعة
- التصميم. كل قطعة بتبلّش رسمة أو تصميم CAD: خريطة، أرزة، أو كلمة بالعربي.
- تشكيل المعدن. القطع المسطّحة بتبلّش بالترقيق: المعدن بيندرفل مرّة ورا مرّة لحتى يوصل للسماكة المظبوطة. والقطع المجسّمة بتنعمل نموذج 3D، بعدين قالب، وبعدين بتنصبّ بالمعدن.
- القصّ. الشكل بينقصّ، أحياناً بالإيد وأحياناً باللايزر، حسب التصميم.
- التجميع. القطع بتنلحم، بتنركّب الحلقة، وبتصير قطعة وحدة.
- التنظيف والتلميع. كل طرف بينبرد وبيتلمّع لحتى يصير ناعم.
- الترصيع. وين ما التصميم بدّو، الحجار بتتركّز حجر ورا حجر.
- الطلي والمينا. القطعة بتنطلى دهب، ووين ما بدّها لون، المينا بتنحطّ بالإيد، درجة ورا درجة.
- اللمسة الأخيرة. كل قطعة بتنفحص، بتنضّف وبتتشطّب.
- العلبة. وبالآخر، بتنحطّ بالعلبة اللي رح تفتحوها.
خمس عيل. قطعة وحدة.
الإيدين اللي ما بتشوفوها
إيديهن سود من غبرة المعدن والتلميع… علامات تعب ما بتشوفوها أبداً بلمعة القطعة.
كل واحد منّن متجوّز، وعندو ولاد ناطرينو بالبيت. ولمّا تفلّ القطعة من طاولتو، بتكون حاملة شطارتو، وساعات شغلو، ولقمة عيش عيلة.
بختارهن لدقّتن، ونظافة تشطيبن، ومتانة شغلن، والاهتمام اللي بيحطّوه بكل قطعة منعملها سوا.
لوين بيروح دعمكن
كتير من الدعم اللي بتلاقيه Miniz جايي من مجتمعنا بالإمارات ومن العرب بكل العالم. وهالدعم ما بيوقف عندي… بيرجع لبرج حمّود، لخمس طاولات وخمس عيل.
شو عم نشتغل لنوصلو
حلمي تكبر Miniz لتأمّن لهالعيل دخل أثبت، ويوماً ما معاشات ثابتة وتغطية صحية وضمان اجتماعي.
وبكل صراحة: هيدا الطريق اللي ماشيين فيه، مش شي موجود اليوم. وكل قطعة بتختاروها بتقرّبنا خطوة.
سلسلة أرواح
لمّا تلبسوا MINIZ، عم تحملوا أكتر من عقد أو خاتم: عم تحملوا شغل خمس عيل، والولاد اللي عم يشتغلوا كرمالن.
شكراً لأنكن جزء منها.
ميراي عيد مؤسِّسة Miniz Jewelry